Mae traethau gwastad, tawel a gwyntoedd da yn golygu bod ein traethau yn ddelfrydol ar gyfer gwyliau haul a phob math o chwaraeon dŵr ar gyfer pobl brofiadol a rhai newydd fel ei gilydd.

Yn y Rhyl, mae tair milltir o draethau euraid yn cynnig amgylchfyd glân a diogel i'ch teulu. Mae gweithgareddau traddodiadol glan y môr megis nofio, padlo a mynd ar gefn y mulod oll ar gael, ond mae cyfle hefyd i bysgota môr, syrffio a syrffio barcud dan lygaid wyliadwrus ein gwasanaeth tymhorol achub bywydau.

Mae Prestatyn yn falch o chwifio'r Faner Las, wedi ei dyfarnu am draethau glân sy'n cynnig ansawdd dŵr da, safonau diogelwch, amgylcheddol ac addysgol uchel. Mae'r tri traeth ym Mhrestatyn – Ffrith, Barcbi a'r Traeth Canol – oll yn cynnig popeth i'r teulu, o dywod eang braf i gyfleusterau a lluniaeth gerllaw. A pheidiwch ag anghofio edrych ar yr olygfa hynod sy'n cyrraedd cyn belled ag Ynys Môn a mynyddoedd Eryri.

Mae ein traethau yn ddiogel hefyd – mae achubwyr bywyd trwyddedig yn gwylio'r parthau penodol ar y traethau ac maent hefyd yn cerdded trwy'r parthau eraill yn rhoi cyngor ar ddiogelwch. Mae tair gorsaf achub bywyd gyda staff, sy'n cynnig cyngor ac arweiniad a chymorth cyntaf os oes ei angen.

Nid ymwelwyr ar ddwy droed yn unig sy'n hoffi ymweld – mae'r rhai sydd ag adennydd a phedair coes yn dod yma hefyd! Mae miloedd o adar mudol yn dod i'r traethau bob blwyddyn, gan gynnwys y Forwennol Fach brin, ac efallai y byddwch yn ddigon ffodus i gael gweld Madfallod Tywod a llyffantod cefnfelyn.