atyniadau

Bydd eich gwyliau yn y Rhyl a Phrestatyn yn apelio at y teulu cyfan, p’un ai ydych yn treulio eich amser yn ymlacio ar ein traethau glân, diogel, neu’n mwynhau atyniadau rhyfeddol Gogledd Cymru.

Mae’r Rhyl yn cynrychioli popeth sy’n fywiog a chyffrous am dref glan y môr, gydag atyniadau fel y Sŵ Môr, lle cewch fynd am dro ar hyd waelod y môr yn yr unig dwnnel tanddwr i gerddwyr yng Nghymru, wedi eich amgylchynu gan siarcod a physgod rhyfeddol eraill. Cyfle i weld mwy na 50 o rywogaethau bywyd morol brodorol, Rhaeadr y Frenhines dramatig a’r ysbyty pysgod lle cewch ymweld â physgod sy’n sâl.

Mae’r Heulfan yn barc dŵr dan do sy’n cynnwys dyfroedd cynnes, llithrennau yn cynnwys Black Thunder a Buzz, a thonnau. Os ydych chi am weld golygfeydd, yna rhowch gynnig ar y Tŵr Awyr unigryw, sy’n strwythur 240 troedfedd o uchder sy’n caniatáu i chi weld yr olygfa yn y Rhyl a thu hwnt i bob cyfeiriad. Lleolir yr atyniad hwn ar Rodfa’r Gorllewin, lle mae’r datblygiadau diweddaraf yn cynnwys gerddi glan y môr, golff mini, theatr awyr agored a pharthau chwarae rhyngweithiol. Gall y teulu cyfan fwynhau ffair Ocean Beach gyda’r ‘Big Dipper’ enwog. A chyda Theatr y Pafiliwn, y Marine Lake, y rheilffordd fach, y gerddi botaneg, tennis a bowlio hefyd rydych yn siwr o fod yn brysur drwy gydol eich gwyliau – os dymunwch.

Mae Prestatyn hefyd yn cynnig adloniant rhagorol yng Nghanolfan y Nova, sy’n cynnwys pyllau nofio dan do, llithren droellog, stiwdio iechyd a ffitrwydd a bwytai a barau i ymlacio ynddynt. Yng nghysgod bryniau a mynyddoedd mae naws mwy hamddenol i’r gyrchfan hon. Dyma ben gogleddol un o hoff Lwybrau Cenedlaethol Prydain. Mae Canolfan Ymwelwyr Clawdd Offa yn cynnwys y Ganolfan Groeso ar y promenâd wrth y Traeth Canolog a dyma’r man cychwyn delfrydol i gerddwyr o bob lefel. Gall cerddwyr a beicwyr fwynhau’r golgyfeydd godidog o fryniau Prestatyn a Bryniau Clwyd cyn mynd ar drywydd hanes yr ardal. Ceir gweddillion baddondy Rhufeinig yma, llecyn claddu o’r Oes Efydd a thystiolaeth o orffennol diwydiannol yn y twnnelau yn y bryn a adwaenir yn lleol fel y ‘Fish Mine’ (oherwydd bod gweddillion y plwm yn aml ar siâp pysgodyn), adfeilion bwthyn mwynwr a’r odynau calch. Casglwch gopi o ‘Crwydro cefn gwlad Prestatyn’ o’r Ganolfan Groeso (ar agor Ebrill – Medi). Mae’n dangos teithiau cerdded yn ac o gwmpas Prestatyn gyda gwybodaeth benodol am fywyd gwyllt a threftadaeth leol, cyn ymweld â phentref cyfagos Gallt Melyd gyda’i eglwys hardd a thafarndai hanesyddol.

Mae’r ardal amgylchynol yn cynnig atyniadau fel y cestyll mawreddog ar hyd arfordir Gogledd Cymru, yn Rhuddlan a Dinbych. Gellir gweld un o’r eglwysi cadeiriol hynafol lleiaf yn Llanelwy, ac ym Modelwyddan cewch ymweld â’r eglwys farmor. Mae plasdai boneddigion megis Plas Bodrhyddan yn cynnig diwrnod diddorol i’r teulu cyfan hefyd.